विद्यालय कर्मचारी परिषद् गुल्मीको अध्यक्षमा श्यामलाल कुँवर निर्वाचित

गुल्मी, कात्तिक ८। नेपाल विद्यालय कर्मचारी परिषद्, जिल्ला कार्यसमिति गुल्मीको अध्यक्षमा श्यामलाल कुँवर सर्वसम्मत रूपमा निर्वाचित हुनुभएको छ।

परिषद्को आज सम्पन्न चौथो जिल्ला अधिवेशनबाट कुँवरको नेतृत्वमा नयाँ जिल्ला कार्यसमिति चयन भएको हो। अधिवेशनबाट उपाध्यक्षमा राजेन्द्र थापा, महिला उपाध्यक्षमा शान्ता गौतम र सचिवमा अनुज पन्थी निर्विरोध निर्वाचित हुनुभएको छ। अधिवेशनले अन्य पदाधिकारी तथा कार्यसमिति सदस्यहरू समेत चयन गरेको छ।

नवनिर्वाचित कार्यसमितिले विद्यालय कर्मचारीहरूको हकहित संरक्षण, पेसागत सम्मान, अधिकार प्राप्ति तथा संगठनको सुदृढीकरणका क्षेत्रमा काम गर्ने अपेक्षा गरिएको छ।

विद्यालय कर्मचारीहरूको साझा आवाजलाई सशक्त बनाउँदै उनीहरूका समस्या, माग र अधिकारका विषयमा प्रभावकारी रूपमा पैरवी गर्नु नयाँ नेतृत्वका लागि प्रमुख जिम्मेवारी रहनेछ। साथै, कर्मचारीबीच एकता, सहकार्य र सांगठनिक एकतालाई मजबुत बनाउँदै पेसागत हकहितका सवालमा उपलब्धिमूलक काम गर्नुपर्ने आवश्यकता देखिन्छ।

चौथो जिल्ला अधिवेशनबाट निर्वाचित अध्यक्ष कुँवरसहित सम्पूर्ण नवनिर्वाचित पदाधिकारी तथा कार्यसमिति सदस्यहरूलाई बधाई दिँदै सफल कार्यकालको शुभकामना व्यक्त गरिएको छ।